يـا أوّل حزيران(*)

 

عَزيزي يا حزيْران، يابيّ كلّ الشُّهور بالمَوَاليد المَجيدِه

لوْما فيك ميلاد الحَبيب الهادي، عندي ما بْتسوى مَجيدِه[1]

مَواليدَك قديمِـه جديدِه، قَدَر مقدَّر، ومَجِد أفْعالَك جِســام

يوْمَك الأوَّل شاهِد ومشهود، بأسمَى مواليد! سيِّدي وسيْدي!

حزيران! يـا مِستوْدَع الأسْرار والآمال، فيك عْــلام

 تْسجَّل ع صفحات الكوْن، “لا يُنسى” فضايْل وأخْلاق حميدِه

يا تاريخ كوْني ما بتمْحيه لا سنيين لا دْهور ولا إيّام

عيديْن، نبُوِّه من السَّما، وميـلاد سيّد المَجْد، بمَبـــادي فريدِه

عْطيتْنا ميلاد داهِش إسـم ع مُسـمَّى، بثغْرك البسَّام

بسّام ثَغرَك بالنُّبُوِّه، آيـات وأمجــاد عُليا، بجْهل بْكَمْ تـردِيدِه

بْدايتها منرَدِّدها، موْلَد أحد رِجـال الله الكِرام العِظام

بإرادِه سَماويّـه، خلِّت ربيع إيَّامْنا يزهِّر وفا، بدايّــه وتمْهيدِه

سيِّدي يـا سيِّدي، العُمر غَفْلِةْ هنا، بتعيش بـالأحلام

وأحلامَك الساميّه رسالِةْ سما وأحْلامْنا عن أحْلامَك مش بْعيدِه

عليْنا طَلْطَل نور شَمسَك، ووّلّــى عَتم ليْل الظَّـلام

يا حبيب الكلّ زهرَك فُلّ، يا أكبَر إمام وإلهام رُوحي بِغذِّي نشيدي

صبَاحَك كَوْكَب نور، ونور فوْق غيْــم الغَمام هــام

 دون أنوارَك ما في كْواكِبْ سَما بتنْسَما، ولا بتنوِّر ليالينا السَّعيدِه

عيدي بعيد ميلاَدَك، وعيد الشَّواهِد يا فَارس الأحلام

إجانـا وإجاكِ فارس الأحْلام يـا رسـالِـةْ الخيْر، كلّ الشَّـــوْق عيدي

رصيدي حُبنا لِكِ ع مَدى الإيـام، واللّيالي، صَدا إلهام

وعِطر خْزام نَقــــي للْواعييّن للنُيَّــام، يوميِّـــه بِـضاعِف رَصيدي

سِلاح التّقوَى أقوَى يا رسالِه، وِسام ع كتافْنا وِسام

سـلاح التّقوى بيدّنا أقوى، من لُعبةْ الكيْد والكييِّدِه وأيَّ مَكيدِه

ومتلما بإيدي، نَغَم ع نَغَم غنّوكِ ورسْموكِ الْقلام

أكبَر نَغَم وأَنْغام، بحرفِك الهادي غنّاكِ كنار القلب مَلْوَا كفّ إيدي

قُربِك مشاعِر هَنا، وللحبيب كلّ التقدير والإحْترام

وهِج نُورو، شَدَّد حنيني، ثبَّتْ يقينـي، إدراك وحكْمِه رَشيدِه

يا ساكِن قلبي بالهوى، أنوارَك ما تَركِت بوجِّي ظَلام

 يا بَدر التَّمام والإتمام، ع نورَك اهتديْنا بمفاهيـم جْديدِه، عَديدِه

ع أناشيدَك يا حبيب الرُّوح، رموش عيُوني ما بتْنام

 كُلما بُحوُرَك غذُّوا فْكـاري، وعُّوا عقلي، بالمؤكّد زاد تإكيدي

أكيدِه بقلوب الأتباع، مقامَك عالي يا عالي المَقام

 عيدَك عيد ميـلاد المحبِّه، حَرْفو وعَّى مداركنَـا بصُورَه أكيدِه

من دونَك زهيدِه عيشتي، ومعظَم عُمري ظَلام بظَلام

لكن بِدارَك وقُربك، عتمْ ليْلي نُور وأنوار مهما ســاعاتُو زهيدِه

ع صفحـةْ سْنين عُمري، سجَّلتَك عـام خلف عـــام

 مش عجب، بِبُعدي عنَّك، قلبي انسلخ منِّي، وسكّين قطَّع وريدي

نبع الحسيدِه مَهما طال، جنْب شِلاّل فِكرَك أوهام

ياما اْستأصَدُوك عيون الحسّاد، وياما عنَّك ما نشّف نبعْ الحسيدِه

وإنتْ ولا عَبالَك، سرَّك إلهي، مِسْك الخْتام بكلّ إلمام

ومهما القَدَر غَدَر واْستعْرَضْ مواهْبُو، بفضلَك لْبِسنا حُلِّه جديدِه

حاملَّك بعمق صدري، خزّان شوْق مُستدام بوجّ عام 

 أحلى إيام عُمري إستَلْهِم من تعالِيمَك، و ع روابيكْ إزرع قصيدِي

لو جفّت الصّحف، ونشّفِت فكار وعقول، اكْتُبي يا قْلام

عن مَوْلِـد ومَهام الهادي عبّـي سْـطور، ويوميّأه اصْدُريلنا جَـريدِه

وع يد الشَّواهِد رْجال شاهِد سيّد الكونيْن، ديوانيِّةْ إعلام

جامْعَـه! من نَوْع زَرع الحبيب طيّب الذِّكر أطيَب مْواسِم حَصيدِه

الجّفا لا من عادَاتنا ولا من تقاليدْنا، بإلمام منعْرف المَهام

ع عاتقنا يا رسالِةْ الخيْر وينما كُنتي، بالقلب بالعيْن وحْدِك وحيدِه

اليوم يوم عيد المواليد والمواعيد، بعيّد الشَّواهِد خيرِةْ الأنام

يومْنا اليَوم مش وِداع، تجديد عَهد وّعد للعيد، بألف جُملِه مُفيدِه

اليوْم مننْسى نهداتْ نيسان، لَـوْ سْويِّــه صفّيْنـا رميم عْضام

ع فْراق الحبيب مُجرِم تاسِع نيسان، إِبْن الحَرام، ما بغيّر آيةْ تِوْحيدي

اليوْم عيد المولِد، وعيد بيّ ونبِي الرِّسالِه، وعيدنا بالتَّمام

نيسان يا اْبن اللِّئام، تلاتـِتُن نسُّوني الحُزْن، ونسُّونـا فلمَك التْراجيدي

نسُّونـا آلامْنـا ونهداتْنـا، وتَنَهُّداتْنا وكلّ آهاتْنا، خود عْلام

تناسيْنا حرقِةْ النَّهيد بنهيدي تحت عِنوانَّا، إيام لُقانا بالحبيب انشــالله

قريبِه مش بعيدِه، قَريبِه، مش بعيدِه لا لا مش بعيدِه!

ــــــــــــــــــــــــــــــــــــــــــــــــــــــــــــــــــــــــــــــــــ

[1] المجيدة/ هي وحدة العملة العثمانية القديمة/ عملة ذهبيّة!!!